04-Oct-2025

ମଧ୍ୟପ୍ରଦେଶ: ସମ୍ପ୍ରତ୍ତି ମଧ୍ୟପ୍ରଦେଶରେ ନଅ ଜଣ ଶିଶୁ କୋଲଡ୍ରିଫ୍ କଫ୍ ସିରପ୍ ଖାଇ ମୃତ୍ୟୁବରଣ କରିଥିଲେ । ଏହି ଘଟଣାରେ ମୁଖ୍ୟମନ୍ତ୍ରୀ ମୋହନ ଯାଦବ କଡା କାର୍ଯ୍ୟାନୁଷ୍ଠାନ ନେଇଛନ୍ତି । ସାରା ରାଜ୍ୟରେ କୋଲଡ୍ରିଫ୍ କଫ୍ ସିରପ୍‌କୁ ସମ୍ପୂର୍ଣ୍ଣ ନିଷିଦ୍ଧ କରିବାକୁ ନିର୍ଦ୍ଦେଶ ଜାରି କରିଛନ୍ତି ।ଏ ସମ୍ପର୍କରେ ସୂଚନା ଦେଇ ମୁଖ୍ୟମନ୍ତ୍ରୀ ଯାଦବ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ପୋଷ୍ଟ କରି ଲେଖିଛନ୍ତି ଯେ କୋଲଡ୍ରିଫ୍ ସିରପ୍ ଯୋଗୁଁ ଛିନ୍ଦୱାଡ଼ାରେ ପିଲାଙ୍କ ମୃତ୍ୟୁ ଅତ୍ୟନ୍ତ ଦୁଃଖଦ। ସମଗ୍ର ମଧ୍ୟପ୍ରଦେଶରେ ଏହି ସିରପ୍ ବିକ୍ରୟକୁ ନିଷିଦ୍ଧ କରାଯାଇଛି। ସିରପ୍ ତିଆରି କରୁଥିବା କମ୍ପାନୀର ଅନ୍ୟ ଉତ୍ପାଦଗୁଡ଼ିକର ବିକ୍ରୟକୁ ମଧ୍ୟ ନିଷେଧ କରାଯାଉଛି।ସିରପ୍ ତିଆରି କାରଖାନା କାଞ୍ଚିପୁରମରେ ଅଛି, ତେଣୁ ଘଟଣା ବିଷୟରେ ଜାଣିବା ପରେ ରାଜ୍ୟ ସରକାର ତାମିଲନାଡୁ ସରକାରଙ୍କୁ ତଦନ୍ତ କରିବାକୁ କହିଥିଲେ। ଆଜି ସକାଳେ ତଦନ୍ତ ରିପୋର୍ଟ ମିଳିଛି। ରିପୋର୍ଟ ଆଧାରରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ପିଲାମାନଙ୍କ ଦୁଃଖଦ ମୃତ୍ୟୁ ପରେ ସ୍ଥାନୀୟ ସ୍ତରରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ରାଜ୍ୟ ସ୍ତରରେ ଏହି ଘଟଣାର ତଦନ୍ତ ପାଇଁ ଏକ ଦଳ ମଧ୍ୟ ଗଠନ କରାଯାଇଛି। ଦୋଷୀଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ। କଫ୍ ସିରପ୍ ଉପରେ ପ୍ରତିବନ୍ଧକ ସମ୍ପର୍କରେ ମଧ୍ୟପ୍ରଦେଶ ମନ୍ତ୍ରୀ ବିଶ୍ୱାସ ସାରଙ୍ଗ କହିଛନ୍ତି, “ଶିଶୁ ମୃତ୍ୟୁ ଘଟଣାରେ ମୁଖ୍ୟମନ୍ତ୍ରୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଦୋଷୀମାନଙ୍କୁ ଛଡ଼ାଯିବ ନାହିଁ; ମଧ୍ୟପ୍ରଦେଶରେ ସମ୍ପୂର୍ଣ୍ଣ କଫ୍ ସିରପ୍ ଉପରେ ପ୍ରତିବନ୍ଧକ ଲଗାଯାଇଛି।”

      ବ୍ୟୁରୋ ରିପୋର୍ଟ ଜିଟିଭି ଭାରତ ଓଡ଼ିଆ।