28-Apr-2024

ନୂଆଦିଲ୍ଲୀ: ଜଗନ୍ନାଥ ଧାମ ପୁରୀରେ ନିର୍ମାଣ ହେବାକୁ ଯାଉଛି ୨୨୦୩ କୋଟିର ଏକ ଗ୍ରୀନ୍ଫିଲ୍ଡ ବିମାନବନ୍ଦର । ସରକାରୀ-ଘରୋଇ ସହଯୋଗିତା(ପିପିପି)ରେ ବିକାଶ ହେବାକୁ ଥିବା ଏହି ବିମାନ ବନ୍ଦର ପାଇଁ ଚଳିତବର୍ଷ ଫେବ୍ରୁଆରୀରେ ଟେଣ୍ଡର ଡାକିଥିଲା ଓଡ଼ିଶା ଶିଳ୍ପ ଭିତ୍ତିଭୂମି ବିକାଶ ନିଗମ(ଇଡ୍କୋ) । ତେବେ ବିମାନ ବନ୍ଦରର ବିକାଶ ଲାଗି ଆଗ୍ରହ ଦେଖାଇଛନ୍ତି ୩ ଶିଳ୍ପ ଅଗ୍ରଦୂତ ।ଏହି କମ୍ପାନିତ୍ରୟ ହେଲେ ଆଦାନି ଗ୍ରୁପ୍, ଜିଏମ୍ଆର୍ ଏବଂ ଫେୟାର୍ଫାକ୍ସ । ଭାରତର ବୃହତ୍ ସଂଖ୍ୟକ ବିମାନବନ୍ଦର ଏହି ୩ କମ୍ପାନିଙ୍କ ନିୟନ୍ତ୍ରଣରେ ରହିଛି । ପୁରୀସ୍ଥିତ ସିପସରୁବାଲି ନିକଟରେ ୨,୨୦୩ କୋଟିର ଗ୍ରୀନ୍ଫିଲ୍ଡ ବିମାନବନ୍ଦର ବିକାଶ ପାଇଁ ଏହି କମ୍ପାନିତ୍ରୟ ଆଗ୍ରହ ଦେଖାଇଥିବା ପ୍ରକ୍ରିୟା ସହ ଜଡ଼ିତ ଦୁଇ ଅଧିକାରୀ ସୂଚନା ଦେଇଛନ୍ତି । ପ୍ରକଳ୍ପର ଦ୍ୱିତୀୟ ପର୍ଯ୍ୟାୟ ପ୍ରି-ବିଡ୍ ବୈଠକରେ ଆଦାନି ଏୟାର୍ପୋର୍ଟସ, ଫେୟାର୍ଫାକ୍ସ ଏବଂ ଜିଏମ୍ଆର୍ ଗ୍ରୁପ୍ ପ୍ରତିନିଧିମାନେ ଯୋଗ ଦେଇ ଇଚ୍ଛା ପ୍ରକାଶ କରିଥିବା ସୂତ୍ରରୁ ଜଣାପଡ଼ିଛି । ବିମାନବନ୍ଦରର ନିର୍ମାଣ ଶେଷ ହେବା ପାଇଁ କେତେ ସମୟ ଲାଗିବ, ସଂପୃକ୍ତ କର୍ତ୍ତୃପକ୍ଷମାନଙ୍କଠାରୁ ଆବଶ୍ୟକୀୟ ମଞ୍ଜୁରି ଏବଂ ଫି’ ଷ୍ଟ୍ରକ୍ଚରକୁ ନେଇ ବିଭିନ୍ନ ପ୍ରଶ୍ନ ଉପରେ ବୈଠକରେ ଆଲୋଚନା ହୋଇଛି । ମେ’ ୧୦ ସୁଦ୍ଧା କର୍ତ୍ତୃପକ୍ଷମାନେ ଏହି ପ୍ରଶ୍ନଗୁଡ଼ିକର ଉତ୍ତର ଦେବେ । ବିଡ୍ ଦାଖଲ କରିବାର ଡେଡ୍ଲାଇନ୍ ଜୁନ୍ ୪ ଥିବାବେଳେ ଏହା ଜୁନ୍ ୫ରେ ଖୋଲିବ।ଇଡ୍କୋ ଅନୁସାରେ ପ୍ରକଳ୍ପ ମୂଲ୍ୟ ୨,୨୦୩ କୋଟି । ପ୍ରଥମ ପର୍ଯ୍ୟାୟରେ ଏହି ବିମାନବନ୍ଦରର ବାର୍ଷିକ ଯାତ୍ରୀ ପରିଚାଳନା କ୍ଷମତା ୪୬ ଲକ୍ଷ ରହିବ । ଦ୍ୱିତୀୟ ପର୍ଯ୍ୟାୟରେ ଏହା ୧.୦୧୮ କୋଟି ଏବଂ ତୃତୀୟ ପର୍ଯ୍ୟାୟରେ ଅତିରିକ୍ତ ୧.୬୬୯ କୋଟି ରହିବ ବୋଲି ଅନୁମାନ କରାଯାଇଛି । ନିୟାମକ ମଞ୍ଜୁରୀ ମିଳିଲେ ପ୍ରଥମ ପର୍ଯ୍ୟାୟରେ ହିଁ ଏହି ବିମାନବନ୍ଦର ଅନ୍ତର୍ଜାତୀୟ ହୋଇପାରେ ବୋଲି ଇଡ୍କୋ ସ୍ପଷ୍ଟ କରିଛି । ଇଡ୍କୋ ପକ୍ଷରୁ ଦିଆଯାଇଥିବା ବିବରଣୀ ଅନୁସାରେ, ଏହି ବିମାନବନ୍ଦରର ମୋଟ ଲ୍ୟାଣ୍ଡ୍ ଏରିଆ ପ୍ରାୟ ୧,୧୮୪ ଏକର ରହିବ । ଏଥିମଧ୍ୟରୁ ୧୦୦ ଏକରକୁ ସହର ପାଶ୍ୱର୍ ବିକାଶ ପାଇଁ ରଖାଯିବ । ଜମିର ମୂଲ୍ୟ ୩୦୦ କୋଟି ଟଙ୍କା ଥିବା ଆକଳନ କରାଯାଇଛି । ତେବେ ବିମାନବନ୍ଦରକୁ ଇଡ୍କୋ ଏକ ୪-ଲେନ୍ ଆକ୍ସେସ୍ ରୋଡ୍ ଯୋଗାଇବ । ଓଡ଼ିଶା ବାଣିଜ୍ୟ ଏବଂ ପରିବହନ ବିଭାଗର ଜଣେ ଅଧିକାରୀ କହିଛନ୍ତି ଯେ, ବିଶ୍ୱପ୍ରସିଦ୍ଧ ଜଗନ୍ନାଥ ମନ୍ଦିର ଏବଂ ଅନ୍ୟାନ୍ୟ ପର୍ଯ୍ୟଟନସ୍ଥଳ ନିକଟତର ହୋଇଥିବାରୁ ବ୍ରହ୍ମଗିରି ମୌଜା ନିକଟସ୍ଥ ସିପସରୁବାଲିକୁ ବିମାନବନ୍ଦର ପାଇଁ ବଛାଯାଇଛି। ଫଳରେ ପର୍ଯ୍ୟଟନକୁ ବଳ ମିଳିବ। ପୁରୀକୁ ବିମାନ ଯୋଗେ ପର୍ଯ୍ୟଟକଙ୍କ ଆଗମନ ବଢ଼ିବ। ସୂଚନାଯୋଗ୍ୟ, ଭାରତର ବୃହତ୍ ସଂଖ୍ୟକ ବିମାନବନ୍ଦରର ନିୟନ୍ତ୍ରଣ ଉପରୋକ୍ତ ୩ଟି କମ୍ପାନିଙ୍କ ଅଧୀନରେ ରହିଛି।ଆଦାନି ଗ୍ରୁପ୍ ଭାରତର ସର୍ବବୃହତ୍ ବିମାନବନ୍ଦର ଅପରେଟର ଭାବେ ଜଣା।କମ୍ପାନି ମୁମ୍ବାଇ, ଅହମ୍ମଦାବାଦ, ଲକ୍ଷେ୍ନø, ମାଙ୍ଗାଲୁରୁ, ଜୟପୁର, ଗୌହାଟି ଏବଂ ଥିରୁଅନନ୍ତପୂରମ ବିମାନ ବନ୍ଦରର ପରିଚାଳନା କରୁଛି।ଗ୍ରୁପ୍ ପ୍ରକାଶ କରିଛି ଯେ, ଏହା ନିଜର ବିମାନବନ୍ଦରଗୁଡ଼ିକୁ ଆଭିଏସନ୍ ହବ୍ ଭାବେ ବିକଶିତ କରିବା ଲାଗି ଆସନ୍ତା ୧୦ ବର୍ଷରେ ୬୦,୦୦୦ କୋଟି ଟଙ୍କା ନିବେଶ କରିବ।ସେହିଭଳି ଫେୟାର୍ଫାକ୍ସ ଇଣ୍ଡିଆ ହୋଲ୍ଡିଙ୍ଗ୍ସ କର୍ପୋରେଶନ୍ କାନାଡା ଅରବପତି ପ୍ରେମ୍ ୱାଟ୍ସାଙ୍କ ନେତୃତ୍ୱାଧୀନ କମ୍ପାନି।ବାଙ୍ଗାଲୋର ଅନ୍ତର୍ଜାତୀୟ ବିମାନବନ୍ଦରରେ ଏହାର ସିଂହଭାଗ ଅଂଶଧନ ରହିଛି। ଅନ୍ୟପକ୍ଷରେ, ଜିଏମ୍ଆର୍ ଗ୍ରୁପ୍ ଦିଲ୍ଲୀ ଅନ୍ତର୍ଜାତୀୟ ବିମାନବନ୍ଦର, ହାଇଦ୍ରାବାଦ ଅନ୍ତର୍ଜାତୀୟ ବିମାନବନ୍ଦର ଏବଂ ମନୋହର ଅନ୍ତର୍ଜାତୀୟ ବିମାନବନ୍ଦର, ଗୋଆର ପରିଚାଳନା କରୁଛି।ଏହାସହିତ କମ୍ପାନି ମଧ୍ୟ ଆନ୍ଧ୍ରପ୍ରଦେଶର ବିଜିୟାନଗରମ୍ସ୍ଥିତ ଭୋଗପୂରମଠାରେ ଏକ ଅନ୍ତର୍ଜାତୀୟ ଗ୍ରୀନ୍ଫିଡ୍ ବିମାନବନ୍ଦରର ବିକାଶ କରୁଛି।

      ବ୍ୟୁରୋ ରିପୋର୍ଟ ଜିଟିଭି ଭାରତ ଓଡ଼ିଆ।