11-May-2024
ଭାରତ ସରକାରଙ୍କୁ ପ୍ରାୟ ୧ ଲକ୍ଷ କୋଟି ଟଙ୍କା ପ୍ରଦାନ କରିବ ରିଜର୍ଭ ବ୍ୟାଙ୍କ
ନୂଆଦିଲ୍ଲୀ: ୨୦୨୪-୨୫ ଆର୍ଥିକ ବର୍ଷରେ ଭାରତୀୟ ରିଜର୍ଭ ବ୍ୟାଙ୍କ ଲାଭାଂଶ ଆକାରରେ ଭାରତ ସରକାରଙ୍କୁ ପ୍ରାୟ ୧ ଲକ୍ଷ କୋଟି ଟଙ୍କା ପ୍ରଦାନ କରିପାରେ। ୟୁନିୟନ ବ୍ୟାଙ୍କ ଅଫ୍ ଇଣ୍ଡିଆ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଏହା କୁହାଯାଇଛି। ୨୦୨୩-୨୪ ଆର୍ଥିକ ବର୍ଷରେ ରିଜର୍ଭ ବ୍ୟାଙ୍କ ପକ୍ଷରୁ ଭାରତ ସରକାରଙ୍କୁ ୮୭,୪୦୦ କୋଟି ଟଙ୍କା ପ୍ରଦାନ କରାଯାଇଥିଲା।ସରକାର ୨୦୨୪-୨୫ ଆର୍ଥିକ ବର୍ଷରେ ରିଜର୍ଭ ବ୍ୟାଙ୍କ, ରାଷ୍ଟ୍ରାୟତ୍ତ ବ୍ୟାଙ୍କ ଏବଂ ଆର୍ଥିକ ପ୍ରତିଷ୍ଠାନଗୁଡ଼ିକ ଠାରୁ ମୋଟ ୧,୦୨,୦୦୦ କୋଟି ଟଙ୍କା ପାଇବା ନେଇ ବଜେଟରେ ଆକଳନ କରିଛନ୍ତି। କିନ୍ତୁ ଲାଭାଂଶ ପ୍ରାପ୍ତି ପରିମାଣ ଅଧିକ ରହିବ ବୋଲି ରିପୋର୍ଟରେ କୁହାଯାଇଛି। ଗତବର୍ଷ ମଧ୍ୟ ସରକାର କେବଳ ୪୮,୦୦୦ କୋଟି ଟଙ୍କା ପାଇବା ନେଇ ଆକଳନ କରିଥିବାବେଳେ ୧,୦୪,୪୦୦ କୋଟି ଟଙ୍କା ମିଳିଥିଲା। ତେଣୁ ଗତବର୍ଷ ଭଳି ଚଳିତବର୍ଷ ମଧ୍ୟ ଲାଭାଂଶ ମିଳିବାରେ ଉନ୍ନତି ଦେଖାଦେବ।ରିଜର୍ଭ ବ୍ୟାଙ୍କର ଲାଭାଂଶ ହିସାବକୁ ବିଭିନ୍ନ ବିଷୟ ପ୍ରଭାବିତ କରିଥାଏ। ସୁଧ ଆୟ, ବିଦେଶୀ ମୁଦ୍ରା ଭଣ୍ଡାରରେ ହେଉଥିବା ଲାଭ ଆଦି ଏଥିରେ ଅନ୍ୟତମ। ରିଜର୍ଭ ବ୍ୟାଙ୍କର ବିତ୍ତୀୟ ସ୍ଥିତି ବିବରଣୀରେ ବିଦେଶୀ ମୁଦ୍ରା ସଂପତ୍ତି ପ୍ରାୟ ୭୦ ପ୍ରତିଶତ ରହିବାବେଳେ ପ୍ରାୟ ୨୦ ପ୍ରତିଶତ ସଂପତ୍ତି ଘରୋଇ ସରକାରୀ ବଣ୍ଡ୍ ଆକାରରେ ରହିଥାଏ। ଏସବୁରେ ରିଜର୍ଭ ବ୍ୟାଙ୍କର ସୁଧ ଆୟ ୧.୫ ଲକ୍ଷ କୋଟିରୁ ୧.୭ ଲକ୍ଷ କୋଟି ଟଙ୍କା ମଧ୍ୟରେ ରହିବ ବୋଲି ଆକଳନ କରାଯାଇଛି। ଏଥିସହିତ ନଗଦ ଅର୍ଥ ପରିଚାଳନା ବାବଦ ସୁଧ ମଧ୍ୟ ବୃଦ୍ଧି ପାଇଛି।
ବ୍ୟୁରୋ ରିପୋର୍ଟ ଜିଟିଭି ଭାରତ ଓଡ଼ିଆ।
323
